Heimild til frestunar á niðurfellingu orlofs framlengd
Náðst hefur samkomulag milli opinberra launagreiðenda og heildarsamtaka opinberra starfsmanna um að framlengja heimild til frestunar á niðurfellingu orlofs.
Í tilfelli starfsfólks ríkisins hefur heimild til frestunar á niðurfellingu orlofs, sem að hámarki getur orðið 60 dagar, verið framlengd um eitt ár eða til 30. apríl 2024. Eftir þann dag þá fellur eldra orlof niður. Launagreiðendur bera ábyrgð á að skipuleggja orlofstöku starfsfólks síns að teknu tilliti til óska þess eins og unnt er vegna starfseminnar.
Launagreiðendur þurfa því að:
- Upplýsa starfsfólk um stöðu orlofs.
- Hvetja starfsfólk til að senda inn orlofsóskir hafi það nú þegar ekki verið gert.
- Ákveða sumarorlof starfsfólks fyrir 31. mars nema sérstakar aðstæður hamli.
- Gera tímasettar áætlanir um úttekt uppsafnaðs orlofs hjá þeim sem það á við.
Mikilvægi hvíldar
Eftir sem áður er lögð áhersla á mikilvægi þess að starfsfólk taki orlof sér til hvíldar og endurnæringar en safni því ekki upp.
